موضوع مبسط عن التخاطر
التخاطر هو عملية تبادل للمعلومات من غير استعمال الكلام
وفى الطاقه الكون كله بيتكون من ترددات, الترددات دى عندها القدره على حمل المعلومات ونقلها من شخص لشخص او من شخص لمجموعات ,والطاقه بتربط الناس كلها ببعضها وبتربطهم بالكون كله وبالتالى فالكون كله فى عملية تواصل واتصال مستمره.
ايه العوامل اللى بيتوقف عليها نجاح او قوة التخاطر؟
1- درجة معرفة الشخص المرسل بالطاقه وفهمه ليها ومدى قدرته على التحكم فيها والتعامل بيها وتوجيهها
2- درجة قوة الشخص المرسل طاقيا ,ومدى صفاء واتزان مجاله الطاقى
3- درجة الصفاء الذهنى للشخص المرسل وقدرته على ترتيب افكاره وعدم التشويش
4- طاقة المكان المحيط بالشخص المرسل والمستقبل ومدى نقائها وصفائها وتيسيرها لعملية نقل الطاقة بدون معوقات
5- درجة قوة العلاقة بين الطرفين المرسل والمستقبل
6- درجة اصرار الشخص المرسل على توصيل رسالته
ازاى اقدر احصل على اقوى نتيجة للتخاطر؟
1- الايمان بقدرتى على القيام بعملية التخاطر وعدم اليأس
2- التدريب المستمر على التخاطر مع اشخاص اعرفهم وقياس مدى نجاح التجربه يعنى احاول ابعت لحد فكره ولما اخلص ارجع اساله وصلت وللا لا وايه درجة وضوحها
3- الاستمرار على تمارين التنفس والتأمل اللى بتعلى الطاقه والقيام بيها قبل عملية التخاطر علشان تقوى طاقتى وتعليها وعلشان تصفى ذهنى كمان – فى اول تعليق فيديو فيه تمارين بسيطه تابعوه هيفيدكم جدا
4- التدريب على التركيز على فكره واحده وعدم التشوش بين افكار كتير
5- التخلص من الافكار السلبيه اللى هتقولى انى مش هنجح او ان الفكره مش هتوصل
6- اختيار مكان مريح بحبه وطاقته ايجابيه – حديقه – بحر او حتى مكان فيه زرع بسيط
7- ارتداء ملابس من مواد طبيعيه ومريحه
8- التدريب على عملية التخيل حتى الوصول لدرجة الوضوح فى الصورة المتخيله
9- اختيار وقت مناسب للتخاطر تكون متأكد ان محدش هيقاطعك خلاله
وبالنسبه لتمارين التخاطر فموجود منها كتير على اليوتيوب والمواقع اقدر اجرب منها كذا تمرين لحد ما اوصل لافضلهم بالنسبه لى من حيث السهوله والنتيجه
وده تمرين منقول من احد المواقع الاجنبيه ومجرب وبسيط تقدرو تقومو بيه بسهوله باذن الله :
1- اختار الشخص اللى عايز تتخاطر معاه
2- ابدا بتمرين التنفس (الفيديو فى اول تعليق)
3- غمض عينيك وتخيل انك واقف قدام شاشة سينما
4- تخيل نفسك واقف فى مكان كله زرع وماسك فى ايدك سبع بالونات بالوان الطيف السبعه
5- ابدأ بالبالونه الحمراء وسيبها من ايدك وشوفها وهى بتطير فى السماء وبعدين سيب باقى البالونات بالتوالى
6- اتنقل للشاشه وشوف الشخص اللى عايز تتخاطر معاه موجود جواها وعلى الطرف الاخر تخيل تليفون محطوط قدامه
7- تخيل الشخص وهو بيمسك التليفون وبيكلمك منه وهو مبسوط ومرتاح
8- تواصل معاه وبلغه برسالتك واتاكد انها وصلته بوضوح
9- يكرر التمرين لمدة خمس ايام متتاليه للوصول لافضل نتيجه
مع مراعاة الملاحظات التالية عند محاولات جذب او التخاطر مع شخص معين:
1- الطرف الاخر ( المرسل اليه ) هو شخص له ارادة وشخصية مستقلة ويقدر يستقبل الرسالة ويرفض الاستجابة ليها
2- الطرف المقصود من الجذب قد يكون بالفعل مرتبط او رافض للارتباط
3- الشخص المقصود من الجذب قد تكون ليه مواصفات ورغبات فى الشخصية اللى حابب يرتبط بيها مختلفة عن الشخص اللى قام بالجذب
4- احيانا فى محاولات التخاطرالطرف الاخر ممكن يشعر بالارتباك وده وارد يخليه يتعامل بتوتر او اختلاف مع الطرف اللى بيقوم بالتخاطر
5- بالنسبة للشخص اللى بيقوم بالتخاطر محتاج تكون طاقته قوية ومركزه علشان يقدر يعمل محاولة التخاطر او تجربة الجذب بقوة
6- التمارين ممكن تحتاج تدريب او ممارسة من الشخص اللى بيقوم بيها علشان كده محتاجة صبر
7- بعض الحالات بتحتاج تكرار ممارسة التمرين قبل ملاحظة اى نتيجة
فى النهاية التخاطر والجذب مستحيل يجبرو شخص انه يعمل حاجه مش عايز يعملها, ولا يخلو شخص يحب حد مش عايز يحبه