علشان اقدر اواجه الطاقات السلبيه اللى حواليه واحافظ على طاقتى الايجابيه محتاج اتحرك فى اتجاهين:
- جزء سلوكى: اتعلم طريقة التعامل السليمه مع الشخصيات السلبيه او المحبطه اوالمبتزه
- جزء طاقى: بتعلم ازاى ازود طاقتى الايجابيه علشان اقدر اواجه الطاقات السلبيه الموجهه ليا
طيب ازاى اقدر اعلى طاقتى الايجابيه من غير مااكون دارس للطاقه؟
والاجابه ان ربنا خلقلنا حاجات بسيطه حوالينا بتخلصنا من الطاقات السلبيه وتعلى طاقتنا الايجابيه ومنها:
1- الاكل والشرب الصحى والتغذيه المتوازنه
2- الامل فى ربنا والتفاؤل ان القادم خير باذن الله
3- تقضية وقت فى الاماكن الطبيعيه زى الجناين والاماكن المفتوحه وحتى الصحراء والجبال
4- حاوط نفسك بناس بتحبهم وبيحبوك
5- الصلاه والتامل هما اهم وسيلة لتصفية الذهن والتوازن والحفاظ على الهدوء والسلام النفسى
6- المشى من اهم مصادر شحن الطاقة الايجابيه ومهم جدا لتفريغ الطاقة السلبيه من الجسم
7- الرياضه بشكل عام بتساعدنا نتخلص من الطاقات السلبيه وحتى الطاقات الراكده فى جسمنا ومصدر مهم للطاقه الايجابيه
8- الحيوانات والاطفال من مصادر البهجه اللى فى الدنيا ومصدر رائع للطاقه الايجابيه
9- التنفس العميق من اهم مصادر الطاقة الايجابيه المجانيه اللى معظمنا بيتجاهلها
10- احاول قدر الامكان اخلى المكان اللى عايش فيه يكون نضيف ومرتب واتخلص من الكراكيب
دى بعض الحاجات البسيطه والمتاحه لينا جميعا اللى لو حافظنا عليها وقدرنا نعملها هتبقى مصدر مضمون ومجانى للطاقة الايجابيه